धरित्रीच्या कुशीमधे (Dharitrichya kushimadhe by Bahinabai Chaudhari)

धरित्रीच्या कुशीमधे बियबियाणं निजली,
वर पसरली माती जशी शाल पांघरली

बीय डरारे भूमीत सर्व कोंब आले वर,
गहिवरल शेत जस अंगावरती शहार

ऊनवार्‍याशी खेळता एका एका कोंबांतून,
प्रगटली दोन पान जशी हात ती जोडून

टाळ्या वाजवती पान दंग देवाच्या भजनी,
जशी करती करुणा होऊ दे रे आबादानी

दिसामासा होय वाढ रोप झाली आता मोठी,
आला पिकाला बहर झाली शेतामध्ये दाटी

कशी वार्‍यानं डोलती दाणे आले गाडी गाडी,
देव अजब गारुडी.. देव अजब गारुडी

__ बहीणाबाई चौधरी